आदीवासी जनजातीको बन्दले पाँचथरको जनजीवन प्रभावित

रविन भट्टराई

१० माघ, ताप्लेजुङ । पाँचथरमा गोरु काटेको अभियोगमा पक्राउ परेकाहरुलाई छोड्नु पर्ने भन्दै आदीवासी जनजाती महासंघको अगुवाईमा आज बिहानैवाट गरिएको पाँचथर बन्दका त्यहाँको जनजीवन प्रभावित भएको छ । पाँचथर बन्दका कारण ताप्लेजुङमा पनि यातायातका साधन चलेका छैनन ।

ताप्लेजुङवाट पाँचथर, इलाम र झापाका लागी छुट्ने आधा दर्जन बस तथा ट्याक्सीहरु नछुटेपछि यात्रुहरु अलपत्र परेको बुकिङ काउण्टरका इञ्चार्ज राजन गुरुङले वताउनुभयो ।

आदिवासी जनजाती लगायतका आठ वटा संगठनले आज र भोली दुई दिनका लागी पाँचथरको फिदिम वजार र यातायात बन्दको आव्हान गरेकाले त्यसको प्रभाव ताप्लेजुमा पनि परेको छ ।

यद्यपी ताप्लेजुवाट छुट्ने लामो दुरीका सवारी साधन नचलेपनि छोटो दुरीका सवारी साधन चलिरहेका छन । गत पुस २६ गते पाँचथरको नागीन गाविस्थित फेमे खोलावाट गोरु काटेको अभियोगमा ६ जनालाई प्रहरीले पक्राउ गरेपछि विना सर्त रिहा गर्न माग गर्दै जनजाती संगठनले चरणवद्ध आन्दोलन गर्दै आएका छन ।

प्रहरीले दल वहादुर गुरुङ, दीपक आङवो, रमेश नेम्वाङ, रमित गुँरागाई, विनोद नेम्वाङ र शुभचन्द्र राईलाई पक्राउ गरेको आदिवासी जनजाती महासँघ पाँचथरका अध्यक्ष विर्ख वहादुर वाइवाले वताउनुभयो ।

पक्राउ परेकाहरुलाई छुटाउन प्रशासनसँग पटक पटक आग्रह गरेपनि सुनुवाइ नभएकाले वाध्य भएर आन्दोलन गर्नु परेको वाइवाले जानकारी दिनुभयो ।