महिला हिंसा अन्य गर्न प्रतिबद्ध प्रधानम

Prime Minister Babu Ram Bhattrai

२५ फागुन, काठमाण्डौं । प्रधानमन्त्री डा. बाबुराम भट्टराईले महिला विरुद्ध हुने सबै प्रकारका हिंसालाई नियन्त्रण गर्न मुलुकको राष्ट्रिय तथा अन्तर्राष्ट्रिय प्रतिबद्धता बमोजिम नीतिगत एवम् कानुनी व्यवस्था समेत सरकारले गर्दै आएको बताउनुभएको छ । महिला अधिकार दिवसको अवसरमा सम्पूर्ण नेपाली दिदि बहिनीहरुलाई शुभकामना दिनुहुँदै प्रधानमन्त्री भट्टराईले महिलामाथि हुने सबै विभेद हटाउँदै राज्यका संयन्त्रहरूमा महिलाको अर्थपूर्ण उपस्थिति गराउँदै लैजानु आजको आवश्यकता हो भन्नुभयो ।

महिलाहरूको प्रजननसम्बन्धी र स्वास्थ्यसम्बन्धी हक, पैतृक सम्पत्तिसम्बन्धी हकलगायत अन्य हकलाई सुरक्षित गरेको बताउँदै प्रधानमन्त्रीले सरकारले महिलामाथि हुने सबैखाले हिंसा र अमानवीय व्यवहारको अन्त्य गरी लैङ्गिक समानता कायम गर्न लैङ्गिक हिंसा अन्त्य तथा लैङ्गिक सशक्तीकरण सम्बन्धी राष्ट्रिय रणनीति तथा कार्ययोजना २०६९/०७०- ०७३/०७४ तर्जुमा पनि कार्यान्वयनमा ल्याइएको उल्लेख गर्नुभयो ।

उहांले महिला हिंसा नियन्त्रण गर्न सम्बद्ध निकायहरूबीच समन्वय गर्ने उद्देश्यले प्रधानमन्त्री तथा मन्त्रिपरिषद्को कार्यालयमा लैङ्गिक सशक्तीकरण समन्वय एकाइ स्थापना गरी कार्य गर्दै आएको जानकारी गराउनुभएको छ ।